In Sahme Hue Shahron Ki Faza Kuchh Kahti Hai

in sahme hue shahron ki faza kuchh kahti hai

kabhi tum bhi suno ye dharti kya kuchh kahti hai

ye thithuri hui lambi raten kuchh puchhti hain

ye khamushi avaz-numa kuchh kahti hai

sab apne gharon men lambi taan ke sote hain

aur duur kahin koyal ki sada kuchh kahti hai

jab raat ko taare baari baari jagte hain

kai Duube hue taron ki nida kuchh kahti hai

kabhi bhor bhae kabhi shaam pade kabhi raat gae

har aan badalti rut ki hava kuchh kahti hai

mehman hain ham mehman-sara hai ye nagri

mehmanon ko mehman-sara kuchh kahti hai

bedar raho bedar raho bedar raho

ai ham-safaro avaz-e-dara kuchh kahti hai

‘nasir’ ashob-e-zamana se ghafil na raho

kuchh hota hai jab khalq-e-khuda kuchh kahti hai

Leave a Comment