phir jo dekha duur tak ik ḳhamushi paa.i ga.i
main to samjha tha ki ik meri hi goya.i ga.i
phir vahi badal ki ji uḌne ko chahe jin ke saath
phir vahi mausam ki jab zanjir pahna.i ga.i
phir vahi taa.ir vahi un ki ghazal-ḳhvani ke din
phir vahi rut jis men meri naghma-paira.i ga.i
kuchh to hai aḳhir jo saara shahr tariki men hai
ya mira suraj gaya ya meri bina.i ga.i
tham ga.e sab sang sab shor-e-malamat ruk gaya
main hi kya ji se gaya saari saf-ara.i ga.i
puchhti hai dastaken de de ke shorida hava
kis ka ḳhema tha ki jis men raushni paa.i ga.i
Leave a Reply