Talib Baghpati
phir baḌha josh-e-junun surat-e-sailab mujhe
phir kahin gharq na kar de koi girdab mujhe
main vo huun aap jo ho apni tabahi ka sabab
kar ga.i kasrat-e-girya miri gharqab mujhe
chashm men ashk ḳhalish dil men jigar men Tisen
uf ye kya chiiz kiya karti hai betab mujhe
meri ummid men hai yaas ki surat muzmar
meri hasti hai fana misl-e-ḳhat-e-ab mujhe
nichi nazren hon zaban band ho ghairon ko salam
un ki mahfil ke to a.enge na adab mujhe
soz-e-furqat tapish-e-gham ke sabab muddat se
ḳhvab kya arzu-e-ḳhvab hui ḳhvab mujhe
shumi-e-baḳht se tang aa ke jo dariya men gira
mauj ne phenk diya la ke lab-e-ab mujhe
kitna dil-soz hai ‘talib’ tira afsana-e-gham
vo to vo ghair nazar aate hain betab mujhe
Leave a Reply