Kaukab Zaki
mamur-e-uns qalb-e-munavvar talash kar
labrez iltifat se paikar talash kar
tujh ko jo de dua to ḳhuda rad nahin kare
aisa koi faqir-o-qalandar talash kar
manzil se ham-kanar kare karvan ko jo
aisa koi jahan men rahbar talash kar
bulbul ho faḳhta ho ki shahin ki baaz ho
sab mil ki uḌ saken tu vo ambar talash kar
mushkil bahut hai phir bhi zamane men ai ‘zaki’
mehr-o-vafa-o-ḳhulq ka paikar talash kar
ghavvas gar samajhta hai ḳhud ko to ai ‘zaki’
to bahr-e-fan men Duub ke gauhar talash kar
zulm-o-sitam to had se guzarne lage ‘zaki’
amn-o-aman ka koi payambar talash kar
Leave a Reply