Phenki Kisi Ne Kankari Dil Yak-Ba-Yak Dariya Hua

Syed Amin Ashraf

phenki kisi ne kankari dil yak-ba-yak dariya hua

dariya men ik sailab tha sailab tha umDa hua

dil men koi azar tha vo mujh se yuun goya hua

azurda-e-tasir huun dil de diya achchha hua

gaahe ba-rang-e-mehrban gaahe ḳhayal-e-bad-guman

vo bhi to aḳhir phuul hai kanTon men hai uljha hua

is tarah chashm-e-nim-va ghafil bhi thi bedar bhi

jaise nasha ho raat ka ya sub.h ka taḌka hua

lutf-e-nazar vo shai lagi jo jis qadar thi ajnabi

rasta na tha jaana hua chehra na tha dekha hua

ai ḳhatir-e-mehr-ashna us ke talavvun par na ja

ye be-ruḳhi thi ik ada vo sarv tha sidha hua

vo ilm ho ya sha.iri vo faqr ho ya sarvari

ham jis qadar jhukte ga.e qad aur bhi uncha hua

jang-o-jadal ke vaste aḳhir baḌe kyuun aa ga.e

bazicha-e-atfal tha jhagḌa koi jhagḌa hua