paya-e-ḳhisht-o-ḳhazaf aur guhar se uncha
qad yahan be-hunari ka hai hunar se uncha
ek din gharq na kar de tujhe ye sail-e-vajud
dekh ho jaa.e na paani kahin sar se uncha
mangta kis se mujhe sang-e-sar-afrazi de
koi darvaza to hota tire dar se uncha
ham-qadam hai tapish-e-jan to pahunch ja.unga
ek do jast men divar-e-shajar se uncha
ek bigḌi hui tamsil hain saare chehre
koi manzar nahin meyar-e-nazar se uncha
dhuup utri to simaTna paḌa ḳhud men us ko
ek saaya ki jo tha apne shajar se uncha
bulbula uThne ko uTTha to magar bechara
rakh saka ḳhud ko na dariya ke bhanvar se uncha
kaisi pasti men ye duniya ne basaya hai mujhe
nazar aata hai har ik ghar mire ghar se uncha
vo kahan se ye taḳhayyul ke ufuq la.ega
asman ab bhi nahin hai mire sar se uncha
ḳhak-e-‘shibli’ se ḳhamir apna bhi uTTha hai ‘faza’
naam urdu ka hua hai isi ghar se uncha
Leave a Reply