pas-e-yaqin kahin ham bhi tire guman men hain
tira nishan hain ye taare jo asman men hain
haram-sara tha tira dil so chhoḌ aa.e use
vagarna kahne ko ab bhi usi makan men hain
mire nasib ke ḳhush-rang ḳhvab aur sarab
na is jahan men the aur na us jahan men hain
main apne vaste in men se ḳhud hi chun lungi
vo sanehe jo mayassar tiri dukan men hain
sarab hain ye tumhare sab a.ina-ḳhane
basarten bhi na-jane kis imtihan men hain
kabhi vo a.ina-e-chashm men sanvarte the
vo saare ḳhvab nisabon ke jo bayan men hain
na-jane la.enge dil par tabahiyan kya kya
vo hadse jo abhi tak tiri kaman men hain
ye pul-sirat kahan le chala hamen ‘anjum’
na ham zamin ke rahe aur na asman men hain
Leave a Reply