Shiv Om Misra Anvar
pareshan is tarah hone se kya hoga
vahi hoga jo manzur-e-ḳhuda hoga
kabhi socha nahin main ne mohabbat men
vo mujh se ruuTh kar aise ḳhafa hoga
nahin koi shikayat hai mujhe us se
shab-e-furqat men vo bhi to jala hoga
chaloge kab talak tum un ke kandhon par
bhala kya ḳhaak tum ko tajraba hoga
bahut hi mushtarak the dard donon ke
yaqinan ashiqi ka mas.ala hoga
ḳhud apne zehn ki gahra.iyon men gum
kisi kambal men vo lipTa paḌa hoga
saḌak pe raushni ki dauḌ jaari hai
andhera aage aage bhagta hoga
mire atraf ki ḳhalvat men tanha vo
mujhe shiddat se ‘anvar’ DhunDhta hoga
Leave a Reply