Mumtaz Mirza
palkon pe kuchh charagh farozan hue to hain
is zindagi ke marhale asan hue to hain
meri jabin ne jin ko navaza tha kal talak
vo zarre aaj mehr-e-darakhshan hue to hain
nadim bhi honge apni jafaon pe ek din
vo kam-nigahiyon pe pashiman hue to hain
sham-e-vafa jalate hain zulmat-kadon men jo
vo log is jahan men pareshan hue to hain
kis mauj-e-khun se guzre hain ‘mumtaz’ kya kahen
kahne ko aaj ham bhi ghazal-khvan hue to hain
Leave a Reply