Safar Mein Rasta Badalne Ke Fan Se Waqif Hai

safar men rasta badalne ke fan se vaqif hai

vo shakhs chehra badalne ke fan se vaqif hai

hui hai chashm-e-shanasa bhi ajnabi to khula

ki aankh rishta badalne ke fan se vaqif hai

hai aadhe shahr men barish to aadhe shahr men dhuup

hava ilaqa badalne ke fan se vaqif hai

suni-sunai pe ik-dam yaqin mat karna

ye khalq qissa badalne ke fan se vaqif hai

usi ke paas hukumat hai ab qabile ki

ki jo qabila badalne ke fan se vaqif hai

kisi ko pinjra badalne ka shauq hai ‘ruhi’

koi parinda badalne ke fan se vaqif hai