Pahunch Gaya Jo Tasawwur Kisi Ki Mahfil Tak

Shadan Indauri

pahunch gaya jo tasavvur kisi ki mahfil tak

charagh jal ga.e goya nigah se dil tak

vo ajnabi si nigahen utar ga.iin dil tak

musafir aa ga.e bhule se apni manzil tak

hujum-e-hasrat-o-arman ka zikr aur dil tak

pahunch saka na koi apne saath manzil tak

dua mili thi tabahi ki jin safinon ko

vo lauT aa.e hain tufan ko le ke sahil tak

vo jin ka rah-numaon ne saath chhoḌ diya

pahunch ga.e gham-e-manzil ko le ke manzil tak

bahut tavil nahin phir bhi ai tajalli-e-dost

hazar moḌ milenge nigah se dil tak

tafakkurat ulajhte rahe dimaghon se

nazar bacha ke mohabbat pahunch ga.i dil tak