Shaheen Abbas
pahle to miTTi ka aur paani ka andaza hua
phir mujhe apni pareshani ka andaza hua
ai mohabbat tere dukh se dosti asan na thi
tujh sa ho kar teri virani ka andaza hua
umr-bhar ham ne fana ke tajarbe ḳhud par kiye
umr-bhar men alam-e-fani ka andaza hua
ik zamane tak badan be-ḳhvab be-adab the
phir achanak apni uryani ka andaza hua
tere hathon jal uThe ham tere hathon jal bujhe
hote hote aag aur paani ka andaza hua
suraten bigḌin to apni halaton men aa.e ham
a.ina TuuTa to hairani ka andaza hua
Leave a Reply