Poet
pahle saf-e-ushshaq men mera hi lahu chaaT
shamshir-nigah teri ne kya kya na kiya kaaT
gulshan men hansi dekh ke us gul ki yakayak
hasrat se ga.e ghunchon ke yak-laḳht jigar phaaT
itna bhi diya sabr na us nafs-dani ko
kutte ki tarah baiThta qismat ka diya chaaT
dhulva.iye kya jama-e-isyan ko basao
chal kuuch men dariya ke kinare hain khaḌe ghaaT
ho ghalla-e-ḳhilqat se na sauda-e-mohabbat
hai ishq ki dukkan so baniye ki nahin haaT
ik pashm-nazar un ki men hai shaal do-shala
jo baiThe bichha boriya aur oḌh liya TaaT
sattar do bahattar hain tariq un se alahada
hai ishq ki manzil ki judi raah judi baaT
ishqiya kahe sher o ya mad.h-o-manaqib
aalam ka banvaḌa kahe sha.ir nahin hai bhaaT
tab raf.a ḳhalish ho.e miyan dil se ‘muhib’ ke
kahte hain so tujh se kahe dil khol ke dukh baaT
Leave a Reply