pahle atlas men jo malbus kiye jaate hain
phir vo aivanon men mahbus kiye jaate hain
main unhen hita-e-tahrir men la.un kaise
dard likkhe nahin mahsus kiye jaate hain
bal-o-par kaaT ke den izn-e-riha.i kyun-kar
un parindon ko jo manus kiye jaate hain
itni asan nahin hoti hai ye rah-e-suḳhan
paar is men ka.i qamus kiye jaate hain
in pe to aap hi jhuk jaati hai rab ki rahmat
jo bhi is duniya se mayus kiye jaate hain
kyon na hon zer-o-zabar taḳht-e-‘masarrat’ un ke
raqs jab saya-e-ta.us kiye jaate hain
Leave a Reply