Naz Muzaffarabadi
paḌhne ko bahut kuchh hai kitabon ke alava
kuchh aur paḌho yaar nisabon ke alava
kya aur bhi kuchh log yahan jaan se guzre
ham ishq-zada ḳhana-ḳharabon ke alava
har roz naya roz-e-qayamat hai zamin par
ab yaad nahin kuchh bhi azabon ke alava
sunte hain koi jogi yahan aaya hua hai
ta.abir batata hai jo ḳhvabon ke alava
gar dekh rakha ho to koi ham ko bata.e
duniya ki haqiqat ko sarabon ke alava
jo ‘naz’ ko paḌhte hain vo phulon ki dukan se
kuchh aur nahin lete gulabon ke alava
Leave a Reply