Kuchh Din Hawa-E-Be-Sar-O-Saman Ke Sath Bhi

kuchh din havā-e-be-sar-o-sāmāñ ke saath bhī

sāñsoñ kā kārvāñ liye tūfāñ ke saath bhī

ārā.ish-e-visāl pe kyoñ itnā shaad huā

ye jhuuT to hai shorish-e-hijrāñ ke saath bhī

dil hai to dil ke saath haiñ sab kārobār-e-dard

jī hī to leñge hasrat-e-vīrāñ ke saath bhī

ham vo musāfirān-e-azal haiñ ki har ghaḌī

dariyā ke saath bhī haiñ bayābāñ ke saath bhī

kuchh duur chal ke lauT ke aane kī zid pe hai

dil kārvān-e-ahal-e-bahārāñ ke saath bhī

Leave a Comment