bas tiri had se tujhe aage rasa.i nahin di
main ne gaali to koi ai mire bhaa.i nahin di
mujhe har fikr se azad samajhne vaale
mere mathe ki shikan tujh ko dikha.i nahin di
dil men ik shor uTha haath chhuḌane se tire
der tak phir koi avaz suna.i nahin di
phuul kaḌhe hain mire talvon pe vahshat ne miri
tapte sahra ne mujhe abla-pa.i nahin di
ek-duje se yuun vabasta hue ham donon
main ne chaha nahin us ne bhi riha.i nahin di
vasl aaya tha tire hijr ka sauda karne
ishq ki ham ne magar pahli kama.i nahin di
haath kya soch ke khincha hai sitam se us ne
main ne zaḳhmon ki to ‘zishan’ duha.i nahin di
Leave a Reply