Sameena Gul
baḌe hi tez chubhte hain ye lahje maar dete hain
mujhe aksar ye apnon ke ravayye maar dete hain
jise apna samajhte hain vahi taklif deta hai
ye dar dar ja pe hain khulte dariche maar dete hain
jise ham tuul dete hain takalluf bartaraf ho kar
ta.alluq se bandhe aksar vo rishte maar dete hain
bahut taklif dete hain vo qisse na-shanasi ke
hamesha be-sabab guzren vo lamhe maar dete hain
nahin ma.alum hote hain magar ma.alum hote hain
bahut ma.adum hote hain vo jazbe maar dete hain
jinhen jaana nahin hota vo aksar lauT jaate hain
achanak se ḳhafa ho kar ye apne maar dete hain
tumhare samne aa kar ye luknat si jo paḌti hai
adhure be-zaban ho ke ye jumle maar dete hain
miri koshish ye hoti hai miri baten karo mujh se
zamane bhar ke hote hain vo qisse maar dete hain
Leave a Reply