Urooj Zaidi Badayuni
pa-e-talab ki manzil ab tak vahi gali hai
aghaz bhi yahi tha anjam bhi yahi hai
jis dastan-e-gham ka unvan raushni hai
har lafz ki siyahi ḳhud munh se bolti hai
tarz-e-tapak qaa.em lutf-e-nazar vahi hai
lekin ye vaqi.a hai phir bhi koi kami hai
un ki nazar se dil ki ye bahs ho rahi hai
kya chiiz zindagi men maqsud-e-zindagi hai
har laghzish-e-bashar par tanqid karne vaalo
tum ye bhula chuke ho insan aadmi hai
ye sazish-e-taghayyur hai kitni jan-leva
mujh ko jaga ke meri taqdir so ga.i hai
haan mere vaste hai taḳhsis ka ye pahlu
duniya samajh rahi hai andaz-e-be-ruḳhi hai
mumkin nahin ki daman be-dagh ho kisi ka
sach puchhiye to duniya kajal ki koThari hai
tabinda har-nafas hai ummid ki badaulat
mehrab-e-zindagi men ik sham.a jal rahi hai
dekhe to koi shan-e-sahar-e-nigah-e-saqi
saghar men khinch ke ruh-e-mai-e-ḳhana aa ga.i hai
vabasta-e-nafas hai nazm-o-nizam-e-hasti
ya.ani hava pe qaa.em buniyad=-e-zindagi hai
kab tak ye ḳhvab-e-ghaflat jaago ‘uruj’ jaago
ab dhuup baḌhte baḌhte sar par hi aa ga.i hai
Leave a Reply