Arsh Malsiyani
bigḌi hui qismat ko badalte nahin dekha
aa jaa.e jo sar par use Talte nahin dekha
kyuun log hava bandhte hain himmat-e-dil ki
ham ne to use gir ke sambhalte nahin dekha
ham jaur bhi sah lenge magar Dar hai to ye hai
zalim ko kabhi phulte-phalte nahin dekha
ahbab ki ye shan-e-harifana salamat
dushman ko bhi yuun zahr ugalte nahin dekha
ashkon men sulagti hui ummid ko dekho
paani se agar ghar koi jalte nahin dekha
har-dam mire dil hi ko jalati rahen aahen
ghar ghair ka lekin kabhi jalte nahin dekha
vo raah sujhate hain hamen hazrat-e-rahbar
jis raah pe un ko kabhi chalte nahin dekha
ulfat men agar jaan nikal jaa.e to sach hai
dil se magar arman nikalte nahin dekha
kyuun chahne valon se ḳhafa aap hain itne
parvanon se yuun sham.a ko jalte nahin dekha
har ek ilaj-e-dil betab hai be-sud
is ko to kisi taur bahalte nahin dekha
ai ‘arsh’ gunah bhi hain tire daad ke qabil
tujh ko kaf-e-afsos bhi malte nahin dekha
Leave a Reply