Saif Zulfi
oḌhi rida-e-dard bhi halat ki tarah
tarikiyon men Duub ga.e raat ki tarah
sheva nahin ki shola-e-gham se karen gurez
har zaḳhm hai qubul na.i baat ki tarah
niind aa rahi hai karb ki aghosh men mujhe
siine pe dast-e-gham hai tire haat ki tarah
main apne aap se kabhi bahar na aa saka
uljha raha huun ḳhud main ḳhayalat ki tarah
hairan huun ki ḳhud ko bhi pahchanta nahin
jazbe badal rahe hain rusumat ki tarah
vo dauḌ hai ki apni hava bhi na chhu sakun
uḌti hai meri fikr bhi lamhat ki tarah
kya gul khila.e meri udasi ki lahr ne
zehnon ke reg-zar men barsat ki tarah
kya bastiyon ka zikr ki ehsas ki tapish
jangal jala ga.i mire jazbat ki tarah
kya ḳhuub ashna hain ki pahchante nahin
jab bhi mile to pahli mulaqat ki tarah
duniya ka dard apne dukhon men sameT kar
mahsus kar raha huun gham-e-zat ki tarah
ahbab kis ḳhulus se ‘zulfi’ miri ghazal
rakhte hain dil ke taaq men saughat ki tarah
Leave a Reply