Dilkash Sagari
jo bujh chuke hain vo lamhe ujalta kyon hai
mire badan pe ḳharashen bhi Dalta kyon hai
main mo’tariz to nahin huun magar ye samjha de
jo marna hai to duniya ko palta kyon hai
tujhe talash hai jis ki vo teri zaat men hai
ye koh-o-ban ye samundar khangalta kyon hai
nahin hai vo tira koi to phir zarurat kya
tu us ke husn ko sheron men Dhalta kyon hai
agar nahin huun main manind-e-mehr-o-mah to mujhe
zamin se koi falak par uchhalta kyon hai
shikast-o-marg men jab tarz-e-asman hai to phir
tu apne TuuTe hue par sambhalta kyon hai
na main rasul na haadi na peshva na imaam
mujhe tu mere vatan se nikalta kyon hai
Leave a Reply