Neelam Malik
niil bahta tha parindon ki qataren thiin vahan
ḳhvab sa manzar tha koi absharen thiin vahan
ik ajab si naghmagi rahti thi qalb-o-ruh men
saans ki mizrab aur dhaḌkan ki taren thiin vahan
ḳhar-o-ḳhas bikhre paḌe hain aarzu ke shahr men
koi din ka zikr hai raqsan baharen thiin vahan
ab to in ankhon men khare paniyon ka zor hai
aur tum kahte ho pahle abkaren thiin vahan
ek ik kar ke sabhi va.adon ke bandhan kaT ga.e
lafz kya the ḳhanjaron ki tez dharen thiin vahan
us jagah to aur bhi viran laga dil ka nagar
din Dhale ghar lauTti kunjon ki Daren thiin vahan
Leave a Reply