Nigah Dil Ke Liye Jal Ke Musawi Hai

nigāh dil ke liye jaal ke musāvī hai

ye ā.īna tirī timsāl ke musāvī hai

ga.e dinoñ meñ jise badtarīn kahte the

ab achchhā haal bhī us haal ke musāvī hai

nazar jhukā.e paḌā huuñ maiñ apne paañv meñ

ye jā mire liye pātāl ke musāvī hai

qasam ḳhudā kī kisī aur par agar guzre

ye kaifiyat kisī bhūñchāl ke musāvī hai

samajh sakeñ to ye pal pal dhaḌaktā dil apnā

shumār vaqt ke ghaḌiyāl ke musāvī hai

mire savāl se le kar tire javāb talak

zarā sā vaqfa ka.ī saal ke musāvī hai

tumhārī yaad kī dastak hamārī dhaḌkan par

tumhārī kī huī misscall ke musāvī hai

Leave a Comment