nigah dil ke liye jaal ke musavi hai
ye a.ina tiri timsal ke musavi hai
ga.e dinon men jise badtarin kahte the
ab achchha haal bhi us haal ke musavi hai
nazar jhuka.e paḌa huun main apne paanv men
ye ja mire liye patal ke musavi hai
qasam ḳhuda ki kisi aur par agar guzre
ye kaifiyat kisi bhunchal ke musavi hai
samajh saken to ye pal pal dhaḌakta dil apna
shumar vaqt ke ghaḌiyal ke musavi hai
mire saval se le kar tire javab talak
zara sa vaqfa ka.i saal ke musavi hai
tumhari yaad ki dastak hamari dhaḌkan par
tumhari ki hui misscall ke musavi hai
Leave a Reply