nigah a.ina hai aks-e-musta.ar huun main
hayat qarz hai mujh par to zer-e-bar huun main
pighal na jaa.e ana shiddat-e-tamazat se
giran hai tab-e-ḳharidar kam-ayar huun main
savad-e-shab men ik avaz par huun garm-e-safar
asir-e-zulf na avara-e-bahar huun main
hina.i hathon se chehra chhupa raha hai vo
shikast-e-ahd pe bhi tahniyat-guzar huun main
jo pau phaTe to naved-e-sahar mile ‘ishrat’
hazar raton se sar-ta-pa intizar huun main
Leave a Reply