Koi Jugnu Koi Dipak Kiran Ho Ya Sitara Ho

Poet

koi jugnu koi dipak kiran ho ya sitara ho

safar men raat aa pahunchi koi to ab hamara ho

kisi ke ishq ka naghma hamare lab pe bhi gunje

koi to naam le kar ab hamara bhi pukara ho

kisi ke haath aise hon jo mujh ko thaam sakte huun

mujhe har ek laghzish par sada jis ka sahara ho

koi to sub.h aisi ho ki jab main niind se jagun

miri pahli nazar ko bas vahi chehra nazara ho

kabhi socha hai mumkin hai jise tum bevafa samjhe

vahi laḌki zamane men vafa ka isti.ara ho

tiri palkon ki chaukhaT se jo aansu chun liya main ne

vo ik aansu vahi jugnu mujhe har shai se pyara ho

bhanvar paanv se uljhe hain magar dil ki talab ye hai

mire jivan ki naav ka tira sangam kinara ho

main kachchi niind se jaagi na jaane aaj phir kaise

koi us paar se shayad mujhe phir se pukara ho

junun-e-ishq men ‘iman’ faqat itna parakh lena

jise jugnu samajhti huun ḳhabar kya vo sharara ho