ye jo sar niche kiye baiThe hain
jaan kitnon ki liye baiThe hain
jaan ham sabza-e-ḳhat par de kar
zahr ke ghonT piye baiThe hain
dil ko ham DhunDte hain chaar taraf
aur yahan aap liye baiThe hain
va.izo chheḌo na rindon ko bahut
ye samajh lo ki piye baiThe hain
goshe anchal ke tire siine par
haa.e kya chiiz liye baiThe hain
dast-e-vahshat ko ḳhabar kar de koi
ham gareban siye baiThe hain
haa.e puchho na tasavvur ke maze
god men tum ko liye baiThe hain
aap ke naaz uThane vaale
jaan ko sabr kiye baiThe hain
bal jabin par hai ḳhuda ḳhair kare
aaj vo tegh liye baiThe hain
is tavaqqo pe ki len vo talvar
sar hatheli pe liye baiThe hain
jaan de denge tumhare dar par
ham ab uThne ke liye baiThe hain
zikr kya jam-o-subu ka ki ‘jalil’
ek mai-ḳhana piye baiThe hain
Leave a Reply