nazninan-e-jahan shobada-gar pakke hain
dekhne ko to ye bhole hain magar pakke hain
ham luTa denge mohabbat men mata-e-hasti
ham dikha denge irade ke agar pakke hain
puḳhta-kari ki ḳhabar deti hai ḳhami un ki
kaan ke kachche hain matlab ke magar pakke hain
ye to farma.iye qasmon ki zarurat kya thi
aap iqrar ke va.ade ke agar pakke hain
ḳhauf tufan-e-havadis ka nahin mujh ko ‘aziz’
jin ki buniyad hai mazbut vo ghar pakke hain
Leave a Reply