abhay-kumar-bebak

Nazar To Aas Ki Ab Ahal-e-Asman Pe Hai

nazar to aas ki ab ahal-e-asman pe hai

dua ka tiir abas ajr ki kaman pe hai

zamin nasib kahan duur ke safar se use

vo ek dhuup ka tukda jo saeban pe hai

jise jatan se rakha dil hi dil men vaqt-e-junun

vo raaz shahr men har ek ki zaban pe hai

tamam shauq dhare ke dhare na rah jaaen

junun ke shahr men aafat hamari jaan pe hai

safar men chain kahan daur-e-abla-pai

jo haal uthan pe tha ab vahi Dhalan pe hai

shikar men hain yahan ek dusre ke sabhi

kabhi zamin pe kabhi aadmi machan pe hai

koi to kaat bata mujh ko tu mire maazi

ki ab ke vaar tiri aan baan shaan pe hai

vo shakh-e-zist pe ‘bebak’ lautta hi nahin

parind dil ka jo ab arsh ki udaan pe hai

More Poems

Leave a Comment