nazar se duur rahe ya nazar ke paas rahe
hamesha ishq ke mausam bahut hi ḳhaas rahe
main tere zikr ki vaadi men sair karta rahun
hamesha lab pe tire naam ki miThas rahe
ye iztirab junun ko bahut akharta hai
ki tum qarib ho tan par koi libas rahe
vo ru-ba-ru the to ankhon se daur chal nikle
khuli na botalen ḳhali sabhi gilas rahe
ye baat raaz ki daadi ne ham ko batla.i
hamari umr men abba bhi devdas rahe
main kahkashaon men ḳhushiyan talashne nikla
mire sitare mira chand sab udaas rahe
main muntazar huun kisi aise vasl ka jis men
mire badan pe tire jism ka libas rahe
tiri hayat se juḌ ja.un vaqi.a ban kar
tiri kitab men mera bhi iktisab rahe
Leave a Reply