Zeb Ghauri
naqsh-e-tasvir na vo sang ka paikar koi
us ko jab dekho badal jaata hai manzar koi
kashish-e-harf-e-tabassum hai labon men ru-posh
gosha-e-chashm se hansta hai sitamgar koi
jurra-e-aḳhir-e-mai hai ki giran-ḳhvabi-e-shab
chand sa Duub raha hai mire andar koi
chaḌhte dariya sa vo paikar vo ghaTa se gesu
rasta dekh raha hai mira manzar koi
sadaf-e-bahr se nikli hai abhi laila-e-shab
apni muTThi men chhupa.e hue gauhar koi
kho gaya phir kahin aflak ki pahna.i men
der tak chamka kiya TuuTa hua par koi
saf-e-a.ada hai mire samne aur pusht pe hain
na farishte na ababilon ka lashkar koi
TuuT kar girti hai uupar mire chaTTan ki hai
bai.at-e-sang mire dast-e-hunar par koi
raat bhar taqat-e-parvaz ugati hai unhen
kaaT deta hai sahar-dam mire shahpar koi
mere qatil ne baḌha di mire sach ki tauqir
is sile ke liye mauzun tha payambar koi
aaj is qarya-e-viran men ye aahaT kaisi
dil ke andar hai koi aur na bahar koi
kisi jhaḌi se kiran chhuTi hai suraj ki ki ‘zeb’
chamak uTTha hai kisi haath men ḳhanjar koi
Leave a Reply