har varaq ik kitab ho jaae
aks-e-jalva naqab ho jaae
phuul dekha tha khvab men kal ik
aaj tabir-e-khvab ho jaae
khud-bakhud teri lai pe bajne lage
saans tar-e-rabab ho jaae
ek mushkil ka vaqt vo hoga
jab dua mustajab ho jaae
ik qayamat hai aap ka vaada
chaliye ye bhi azaab ho jaae
mujh ko kanton pe tolne vaale
tu shagufta gulab ho jaae
sajda-e-ishq kar ada ‘tarazi’
ye bhi kar-e-savab ho jaae
Leave a Reply