Nanha Sa Diya Hai Ki Tah-E-Ab Hai Raushan

Shahid Kamal

nanha sa diya hai ki tah-e-ab hai raushan

bujhti hui ankhon men koi ḳhvab hai raushan

sunsan jazire men chamakta hua taara

dil hai ki koi kashti-e-shab-tab hai raushan

dahshat ke farishte hain fasilon pe hava ki

aur charon taraf shahr ke sailab hai raushan

main Dubta jaata huun tiri mauj-e-badan men

yuun raqs men kirnen hain ki gardab hai raushan

haan jism ke is qarya-e-be-nur ke andar

ab bhi vo tire lams ka mahtab hai raushan

main DhunDhta phirta huun jise bam-e-falak par

vo chand sar-e-halqa-e-ahbab hai raushan

‘shahid’ ki jo vo ḳhak-nashin mahram-e-jan hai

sajdon se abhi us ke ye mehrab hai raushan