nahin hai par koi imkan ho bhi sakta hai
vo ek shab mira mehman ho bhi sakta hai
ajab nahin ki bichhaḌne ka faisla kar le
agar ye dil hai to nadan ho bhi sakta hai
mohabbaton men to sud-o-ziyan ko mat socho
mohabbaton men to nuqsan ho bhi sakta hai
bahut garan hai juda.i magar jo hona ho
to phir ye faisla asan ho bhi sakta hai
bas is ḳhabar se ki ye shahr hai hujum sa kuchh
bas ik ḳhabar se ye viran ho bhi sakta hai
Leave a Reply