Rauf Khair
dil dukh na jaa.e baat koi be-sabab na puchh
ḳhana-ba-dosh logon se nam-o-nasab na puchh
had asman ki puchh zamin ka adab na puchh
kin manzilon men hai miri parvaz ab na puchh
nan-e-javin ki aas bhi kiya shai hai ab na puchh
pardesiyon se mashghala-e-roz-o-shab na puchh
be-ghar hue hain dida-e-be-ḳhvab ke qatil
ab jugnuon se lazzat-e-rudad-e-shab na puchh
tere liye huun a.ina-e-pash-pash men
kya kya hai mere vaste ik teri chhab na puchh
pyase hain jaise ek samundar men rah ke ham
tere baghair zindagi karne ka Dhab na puchh
mere lahu tarang se Thera hai surḳh-ru
kya kya na rang hain tiri ankhon ke ab na puchh
ik sho.ala-e-sharab bhi hain aftab bhi
is zamharir men tire shadab lab na puchh
ham ḳhud-shanas bhi hain zamana-shanas bhi
is marhale men jaan se guzre hain kab na puchh
Leave a Reply