Muslim Shameem
nafrat hai faza men to mohabbat bhi bahut hai
jiine ke liye dard ki daulat bhi bahut hai
hai dast-e-sitam-gar ko agar fursat-e-azar
dukhiyaron men dukh sahne ki himmat bhi bahut hai
kuchh sham.a ki hai husn-e-jahan-soz ka jaadu
parvanon men kuchh shauq-e-shahadat bhi bahut hai
ma.il-ba-karam bhi hua karte hain vo aksar
ta.azir-pasand apni tabi.at bhi bahut hai
hain qatl pe amada hama-vaqt vo us ke
jis ke liye ankhon men muravvat bhi bahut hai
ab dast-e-masiha ki karamat hain vo chand
marham bhi hai saman-e-jarahat bhi bahut hai
Leave a Reply