Haneef Akhgar
nafas nafas ne uḌa.in hava.iyan kya kya
ba-rang-e-ishq huiin jag-hansa.iyan kya kya
hamin ne ishq ko husn-e-ana ka rang diya
hamin pe ishq men aa.iin bura.iyan kya kya
mire taqaddus-e-iman se khelti hi rahin
tiri nigah ki kafir-ada.iyan kya kya
sukun-girafta na dil hi na aankh ḳhun-basta
tamam umr rahin na-rasa.iyan kya kya
juda.iyon se bhi uqde rafaqaton ke khule
rafaqaton men bhi aa.iin juda.iyan kya kya
hai aah ek ghazal ashk ik qasida hai
nihan hain gham men bhi naghma-sara.iyan kya kya
rafiq mujh sa kahin pa.egi na ai ‘aḳhgar’
machaegi shab-e-hijran duha.iyan kya kya
Leave a Reply