na hota dahr se jo be-niyaz kya karta
khula tha mujh pe kuchh aisa hi raaz kya karta
mariz kashmakash-e-jabr-o-iḳhtiyar men tha
ilaj-e-jazb-o-kashish chara-saz kya karta
tire karam ne to duniya hi saunp di thi mujhe
bacha ke kuchh na rakha hirs-o-az kya karta
bigaḌ gaya mira huliya to barhami kaisi
the rahguzar men nasheb-o-faraz kya karta
mujhe ḳhabar thi ki main bhi tire sabab se huun
phir apni zaat pe main faḳhr-o-naz kya karta
tamam umr rahe pahre-dar kandhon par
tire ḳhilaf ai ‘anjum’-navaz kya karta
Leave a Reply