nadan kahan tarab ka sar-anjam aur ishq
kuchh bhi tujhe shuur hai aram aur ishq
lene na devenge mujhe tuk chain jiite ji
dushman ye dono gardish-e-ayyam aur ishq
yaan ghash hain shauq-e-tauf hain yaran-e-kaaba ko
ai nama-bar tu kahiyo ye paigham aur ishq
kya naam le ke us ka pukara karun ki yaan
rakhta hai har zaban men ik naam aur ishq
puchha kisi ne qais se tu hai mohammadi
bola vo bhar ke aah ki islam aur ishq
asbab-e-kaenat se bas ho ke be-nava
‘insha’ ne intikhab kiya jaam aur ishq
Leave a Reply