Khursheed Rizvi
nabz-e-ayyam tire khoj men chalna chahe
vaqt ḳhud shisha-e-sa.at se nikalna chahe
dastaken deta hai paiham miri shiryanon men
ek chashma ki jo patthar se ubalna chahe
mujh ko manzur hai vo silsila-e-sang-e-giran
kohkan mujh se agar vaqt badalna chahe
tham gaya aa ke dam-e-baz-pasin lab pe vo naam
dil ye moti na ugalna na nigalna chahe
ham to ai daur-e-zaman ḳhaak ke zarre Thahre
tu to phulon ko bhi qadmon men masalna chahe
kah rahi hai ye zamistan ki shab-e-chardahum
koi parvana jo is aag men jalna chahe
umr isi Thokaren khane ke amal men guzri
jis tarah sang Dhalanon pe sambhalna chahe
sub.h-dam jis ne uchhala tha faza men ḳhurshed
dil sar-e-sham usi baam pe Dhalna chahe
Leave a Reply