poet

Na Ras Aai Chaman-Zar Ki Faza Mujhko

na raas aai chaman-zar ki faza mujh ko

mizaj-e-barq ne be-ghar bana diya mujh ko

tamam umr bhatakte rahe jo rahon men

dikha rahe hain vahi aaj rasta mujh ko

hujum-e-dard men dil ne to sab ka saath diya

mila na apne hi ashkon ka ham-nava mujh ko

vo paas the to har ik shai men dil dhadakta tha

vo duur hain to khatakti hai har faza mujh ko

ye karvan na miri gumrahi pe yuun hansta

rah-e-talab men jo milte vo naqsh-e-pa mujh ko

qadam qadam pe sanvara jinhen mohabbat men

samajh rahe hain vahi ab shikasta-pa mujh ko

koi rafiq na rahbar na koi rahguzar

uda ke laai hai kis shahr men hava mujh ko

‘hayat’ dukhti hui rag ko kis ne chhed diya

uthi vo tiis ki yaad aa gaya khuda mujh ko

More Poems

Leave a Comment