Siddique Mujibi
na puchh marg-e-shanasa.i ka sabab kya hai
kabhi hamen tha ta.alluq sabhon se ab kya hai
jahan sukut musallat hai dam-ba-ḳhud hai hayat
vahin se shor-e-qayamat uThe ajab kya hai
jo zehn hi men siyahi unDel de suraj
to phir tamiz kise sub.h kya hai shab kya hai
janm diya hai dukhon ne ghamon ne paala hai
ḳhuda se puchhiye mera hasab-nasab kya hai
vo zahr-e-ḳhand jo ghole hain chashm o lab ne tire
tujhe ḳhushi ho to puchhen ki zer-e-lab kya hai
uThe hain haath to apne karam ki laaj bacha
vagarna meri dua kya miri talab kya hai
Leave a Reply