Syed Ahmed Shameem
samne ho mai-kada aur mai se begana rahe
ye fareb-e-hosh-mandi hosh-mandana rahe
vo gada ho kar bhi duniya men amirana rahe
multafit jis par tiri chashm-e-karimana rahe
vus.at-e-sahra bhi jab ho tang is ke samne
shahr ka paband kaise koi divana rahe
dastan-e-shauq hai apne lahu se lala-rang
har zamane men hamin unvan-e-afsana rahe
koi aa.e ya na aa.e farq kya hai ishq men
husn ki yadon se raushan dil ka kashana rahe
sab haris-e-chashm-e-bada-rez is mahfil men the
ham khuli davat bhi pa kar be-niyazana rahe
dil ki duniya se koi baḌh kar nahin duniya ‘shamim’
faḳhr us ke vaste hai jo faqirana rahe
Leave a Reply