Shah Naseer
na kyuun ki ashk-e-musalsal ho rahnuma dil ka
tariq-e-ishq men jaari hai silsila dil ka
dikha ke dast-e-hinai na khuun baha dil ka
ki aur rang se lunga main khun-baha dil ka
main tifl-e-ashk ko mizhgan pe dekh hairan huun
ki nur-e-dida hai ya hai balaka dil ka
tu aaine pe na apne kar ai sikandar naaz
ki ham bhi rakhte hain jam-e-jahan-numa dil ka
bahisht pahunche hai zahid! kab us ki vusat ko
ajab ravish ka hai ye bagh-e-dil-kusha dil ka
baja huun sar-ba-gareban ki us ke daman tak
na pahuncha aah kabhi dast-e-na-rasa dil ka
tire khadang-e-mizha se hai yak-qalam majruh
na puchh ai but-e-bad-kesh! majra dil ka
lagai kis but-e-mai-nosh ne hai taak us par
subu-ba-dosh hai saaqi jo aabla dil ka
hazar bain kahen kyuun na ahl-e-binai
ki saaf bu-qalamon hai ye aaina dil ka
bahar tujh ko dikhaenge ham bhi ai gul-ru
kisi ravish se jo ghuncha kabhi khila dil ka
zuhur-e-jalva-e-maabud hai bahar-surat
rakha hai naam baja khana-e-khuda dil ka
ruvaq-e-chashm men mat rah ki hai makan-e-nuzul
tire to vaste ye qasr hai bana dil ka
qarar o taqat o sabr o khirad hue sab gum
tumhari zulf men abtar hai haal kya dil ka
kahenge ham ye sarasar jo koi puchhega
savad-e-hind men luuta hai qafila dil ka
na kyunki aah se khatir nishan ho ab meri
ki tiir ye nahin karta kabhi khata dil ka
hamare daagh se bhanvre ko kya bhala nisbat
ki vo rafiq hai gul ka ye ashna dil ka
laga na dil ko tu apne kisi se dekh ‘nasir’
bura na maan ki is men nahin bhala dil ka
Leave a Reply