Na Koi Shab Badalti Hai Na Koi Din Badalta Hai

na koī shab badaltī hai na koī din badaltā hai

lahū zulmat meñ jab bole nayā sūraj nikaltā hai

koī dasht-e-balā ho yā koī bhī reg-e-sahrā ho

jahāñ ham eḌiyāñ ragḌeñ vahāñ chashma ubaltā hai

gumāñ kā zahr piite ho yaqīñ kā shahd bhī chakkho

isī ke zā.iqe se maut kā nashsha badaltā hai

usī ke saath chaltā hai koī ummīd kā jugnū

ki jis ke dil meñ bhī koī charāġh-e-ishq jaltā hai

ye manzar bārhā dekhā ki har ik vaqt kā jābir

lahū kī raushnī meñ aa ke apnī aañkh maltā hai

Leave a Comment