Na Koi Mehrban Apna Na Koi Raaz-Dan Apna

Murli Dhar Shad

na koi mehrban apna na koi raz-dan apna

jise samjhe the apna dil vo dil bhi ab kahan apna

jo ho chashm-e-karam teri jo ho tu mehrban apna

zamin apni falak apna makin apne makan apna

vo le kar aa.ina baiThe the lene imtihan apna

kiya hathon se apne daman-e-dil dhajjiyan apna

bhaTakte phir rahe hain justuju-e-yar men ab tak

kahin Tikne nahin deta hamen vahm-o-guman apna

javani men kise neki badi ka hosh hota hai

javani men nahin kuchh sujhta sud-o-ziyan apna

zamane ne vo karvaT miri duniya badal Daali

na ab hai raz-dan koi na koi mehrban apna

kisi ko yaad ham aate nahin is anjuman men ab

ba-hamdillah zikr-e-ḳhair rahta tha jahan apna

vo gul hain ham gulistan se uḌe yuun bu-e-gul ban kar

na DhunDe se mila gulchin ko phir nam-o-nishan apna

maza ustad ke sheron ka ham ko ‘shad’ aata hai

vo hai tarz-e-suḳhan apni vo hai rang-e-bayan apna