na ki jafaon men us ne koi kasar phir bhi
lage hue the umidon ko meri par phir bhi
tumhari yaad se vabasta hai hayat miri
kisi ka yuun to hua kaun umr bhar phir bhi
tum apne gird fasilen bana ke baiThe ho
hua to hoga miri yaad ka guzar phir bhi
charagh ankhon ke viran hote jaate hain
tumhari raah se uThti nahin nazar phir bhi
tamam ruup liye chandni chali aa.i
hamara dil raha tarik ek ghar phir bhi
na raushni hai koi aur na raste ma.alum
chale hain aaj tire saath be-ḳhatar phir bhi
tamam umr diya main ne apna ḳhun-e-jigar
mila na mujh ko koi saya-e-shajar phir bhi
bahut thi chaah dil-e-na-tavan ruk jaa.e
tavil hota gaya umr ka safar phir bhi
Leave a Reply