na jaane kaun hai dekha hua sa lagta hai
ik ajnabi hai magar ashna sa lagta hai
tazad-e-surat-o-sirat pe ab yaqin aaya
vo bevafa hai magar ba-vafa sa lagta hai
garan na guzra tha aisa ye intizar kabhi
ab ek lamha bhi sabr-azma sa lagta hai
unhen umiid ho ta.amil ki to kyuun kar ho
ki un ka hukm hi kuchh iltija sa lagta hai
ye phuul sada-o-be-rang hi sahi lekin
tumhare joḌe men kya ḳhushnuma sa lagta hai
vo bhaa.i bhaa.i hain rahte hain ek hi ghar men
magar diyon men baḌa fasla sa lagta hai
vo tum vo main vo lab-e-ju vo raat aur vo chand
ye ek ḳhvab hi kitna bhala sa lagta hai
na mujh men vasf na ḳhubi na kuchh hunar phir bhi
tamam shahr mira ham-nava sa lagta hai
ye aaj shahr men kya baat ho ga.i ‘kausar’
jise bhi dekhiye sahma hua sa lagta hai
Leave a Reply