Syed Amin Ashraf
na jaane jaa.e kahan tak ye silsila dil ka
vo mil bhi jaa.e to milta nahin sila dil ka
baras rahi thiin baharen taras rahi thi zamin
safar tamam hua phuul kab khila dil ka
kahan hai vo shah-ḳhubi kahan daricha-e-shab
ga.e vo din ki sama.at men tha gila dil ka
vahi ḳharabi-e-jan ka sabab bhi hai lekin
qarar-e-jan hai ki ye hai muamla dil ka
use fusun-gar o be-mehr main nahin kahta
firaq-e-yar ka baa.is hai fasla dil ka
talash usi ki musalsal usi ko pa kar bhi
zamin se ta-ba-falak hai ye mashghala dil ka
kisi tilism-e-hijabat men koi gham hai
bhaTak raha hai ḳhayalon men qafila dil ka
Leave a Reply