ye meri aahon men aanch kaisi ye taav kaisa
dahak raha hai ye mere andar alaav kaisa
ye aag kaisi dil-e-hazin men lagi hui hai
ye ansuon ka hai janib-e-dil bahav kaisa
ye kaun ham ko falak se paiham bula raha hai
hai is jahan men ye roz ka chal-chalav kaisa
mohabbaton men rava nahin hai ye vaz.a-dari
bane ho ashiq to ishq men rakh-rakhav kaisa
jab ashk ankhon ki had ke andar hi maujzan hain
to phir ye ankhon ke sahilon men kaTav kaisa
koi to hai jo mujhe Thaharne ko kah gaya hai
safar men ‘tasir’ varna aisa paḌav kaisa
Leave a Reply